काठमाडौं ,श्रावण २४– नेवा: समुदायमा आज क्वाटी पुन्ही पर्व धुमधामका साथ मनाइँदैछ भने अन्य हिन्दू समुदायमा जनैपूर्णिमा पर्व उल्लासपूर्वक मनाइएको छ। राजधानी काठमाडौं, भक्तपुर, ललितपुरसहित देशका विभिन्न स्थानमा बिहानैदेखि पूजा–अर्चना, स्नान र धार्मिक अनुष्ठानको चहलपहल छ।
नेवा: समुदायमा क्वाटी पुन्हीलाई वर्षा ऋतुमा शरीरलाई तन्दुरुस्त राख्ने र रोगप्रतिरोधात्मक क्षमता बढाउने पर्वका रूपमा लिइन्छ। यस दिन सिमी, मस्याङ, चना, केराउ, मटर, बोडी, भटमास, मुकुना र गहत गरी नौ प्रकारका अन्न मिसाएर बनाइने ‘क्वाटी’ खाने परम्परा छ। यस परिकारलाई पोषणयुक्त मात्र नभई मौसमी रोगको जोखिम घटाउने प्राकृतिक औषधि मानिन्छ।