युक्रेन र रूसबीचको युद्ध अन्त्यका लागि अन्तर्राष्ट्रिय प्रयास नयाँ चरणमा प्रवेश गरेको छ। युक्रेनका राष्ट्रपति भोलोदिमिर जेलेन्स्की बेलायतको राजधानी लन्डन पुगेका छन्, जहाँ उनले बेलायत, फ्रान्स र जर्मनीका शीर्ष नेताहरूसँग उच्चस्तरीय भेटवार्ता गरेका छन्। यो भेटवार्ता विशेष गरी अमेरिकाले अघि सारेको नयाँ शान्ति योजनासँग सम्बन्धित रहेको बताइएको छ। लामो समयदेखि चलिरहेको युद्धका कारण युक्रेनमा ठूलो मानवीय संकट उत्पन्न भएको छ भने युरोपको सुरक्षा अवस्थालाई पनि गम्भीर रुपमा असर पुगेको छ।
लन्डनमा भएको छलफलमा युद्धविरामको सम्भावना, युक्रेनको भू-भागीय अखण्डता, दीर्घकालीन सुरक्षा प्रत्याभूति र युक्रेनलाई दिइँदै आएको सैन्य तथा आर्थिक सहयोगका विषयमा गहिरो छलफल भएको बताइएको छ। जेलेन्स्कीले वार्ता सकारात्मक भए पनि चुनौतीपूर्ण रहेको प्रतिक्रिया दिएका छन्। उनले युक्रेनले आफ्ना नागरिक र भूमि जोगाउन कुनै पनि हालतमा सम्झौता नगर्ने स्पष्ट सन्देश दिएका छन्।
युरोपेली नेताहरूले पनि युक्रेनप्रति आफ्नो समर्थन निरन्तर रहने प्रतिवद्धता जनाउँदै कुनै पनि शान्ति सम्झौता युक्रेनको सहमति र हितअनुसार हुनुपर्नेमा जोड दिएका छन्। उनीहरूले युद्ध अन्त्यका लागि कूटनीतिक प्रयास थप सशक्त बनाइने बताएका छन्। तर पूर्वी युक्रेनका केही भूभागको भविष्यका विषयमा अझै स्पष्ट सहमति बन्न नसकेको बताइएको छ।
सन् २०२२ बाट शुरु भएको यो युद्धले लाखौँ मानिस विस्थापित भएका छन् भने हजारौँको ज्यान गएको छ। युक्रेनका सहर–सहरमा ठूलो धनजनको क्षति भएको छ र लाखौँ नागरिक अझै पनि असुरक्षित अवस्थामा बाँच्न बाध्य छन्। यस युद्धले विश्व अर्थतन्त्रमा पनि असर पुर्याएको छ, ऊर्जा संकट, खाद्य मूल्यवृद्धि र अन्तर्राष्ट्रिय राजनीतिक तनाव बढाएको छ।
विश्लेषकहरूका अनुसार लन्डनमा भएको यो भेटवार्ता युद्ध अन्त्यतर्फको महत्वपूर्ण कूटनीतिक प्रयास हो, तर छिट्टै पूर्ण समाधान नआउने सम्भावना पनि उच्च देखिन्छ। रूसको रणनीति, युक्रेनको दृढ अडान र पश्चिमी राष्ट्रहरूको भूमिकाले आगामी दिनहरूमा युद्धको दिशा तय गर्नेछ।
युक्रेन युद्धबारे विश्वभर चासो बढिरहेको बेला लन्डन वार्तालाई स्थायी शान्तिको दिशामा महत्वपूर्ण कदमको रुपमा हेरिएको छ। युद्धबाट थकित आम जनता वास्तविक शान्तिको प्रतिक्षामा रहेका छन्, तर त्यसका लागि अझै कूटनीतिक धैर्य र अन्तर्राष्ट्रिय सहकार्य आवश्यक देखिएको छ।
